ವಿವ ನ್ಯೂಸ್ ಕನ್ನಡ - ಇದು ಸುದ್ದಿಗಳ ಡಬ್ಬಿ

ಹುಕ್ಕಾ ಬಾರ್ ನಡೆಸಿದರೆ ಜೈಲು ತಪ್ಪಿದ್ದಲ್ಲ; 3 ವರ್ಷ ಕಾರಾಗೃಹ ₹1 ಲಕ್ಷ ದಂಡ!

ತಂಬಾಕು ಪ್ರಿಯರಿಗೆ ಇದೊಂದು ಕಹಿ ಸುದ್ದಿ ಇನ್ನು ಮುಂದೆ ತಂಬಾಕು ಮಾರದಿರಲು ಕಠಿಣ ಕಾನೂನು ಕ್ರಮ ಜರುಗಿಸಲಾಗುತ್ತಿದೆ . ಧಾರವಾಡದ ತಂಬಾಕು ಪ್ರಿಯರಿಗೆ ಇದೊಂದು ಕಠಿಣ ಎಚ್ಚರಿಕೆ. ಇನ್ನು ಮುಂದೆ ಸಾರ್ವಜನಿಕ ಸ್ಥಳದಲ್ಲಿ ಸಿಗರೇಟು, ಬೀಡಿ ಅಥವಾ ಯಾವುದೇ ತಂಬಾಕು ಉತ್ಪನ್ನ ಬಳಸಿದರೆ ತಕ್ಷಣ ₹1,000 ದಂಡ ಕಟ್ಟಬೇಕಾಗುತ್ತದೆ! ಹಿಂದೆ ₹200 ಇದ್ದ ದಂಡ ಈಗ ಐದು ಪಟ್ಟು ಜಿಗಿದಿದ್ದು, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಗುಂಜನ್ ಆರ್ಯ ಅವರು ಅಧಿಕೃತ ಪ್ರಕಟಣೆ ಮೂಲಕ ಈ ಕಟ್ಟುನಿಟ್ಟಿನ ಆದೇಶ ಹೊರಡಿಸಿದ್ದಾರೆ. ಸಿಗರೇಟು ಮತ್ತು ಇತರ ತಂಬಾಕು ಉತ್ಪನ್ನಗಳ ಅಧಿನಿಯಮ 2024ರ ಕಲಂ 4ರ ಅಡಿಯಲ್ಲಿ ಈ ನಿಷೇಧ ಜಾರಿಗೆ ತರಲಾಗಿದ್ದು, ಕಾನೂನು ಉಲ್ಲಂಘಿಸಿದವರ ಜೇಬಿಗೆ ಭಾರಿ ಕತ್ತರಿ ಬೀಳಲಿದೆ. ಸಾಮಾನ್ಯ ತಂಬಾಕು ಬಳಕೆಗಿಂತ ಇನ್ನಷ್ಟು ಭಾರಿ ಶಿಕ್ಷೆ ಕಾದಿದೆ ಹುಕ್ಕಾ ಬಾರ್ ನಡೆಸುವವರಿಗೆ. ಕಲಂ 4ಎ ಅಡಿ ಹುಕ್ಕಾ ಬಾರ್ ನಿರ್ವಹಣೆ ಸಂಪೂರ್ಣ ನಿಷಿದ್ಧ. ನಿಯಮ ಮೀರಿ ಹುಕ್ಕಾ ಬಾರ್ ನಡೆಸಿದ್ದು ಪೊಲೀಸರಿಗೆ ಗೊತ್ತಾದರೆ ಕನಿಷ್ಠ 1 ವರ್ಷದಿಂದ ಗರಿಷ್ಠ 3 ವರ್ಷದವರೆಗೆ ಕಾರಾಗೃಹ ವಾಸ ಅನುಭವಿಸಬೇಕಾಗುತ್ತದೆ, ಜೊತೆಗೆ ಕನಿಷ್ಠ ₹50,000 ದಿಂದ ಗರಿಷ್ಠ ₹1 ಲಕ್ಷದವರೆಗೆ ದಂಡ ಬೇರೆ! ಹುಕ್ಕಾ ಅಂದ್ರೆ ಫ್ಯಾಶನ್ ಅಂದುಕೊಂಡಿದ್ದವರಿಗೆ ಇನ್ನು ಈ ಕಾನೂನು ಪಾಠ ಕಲಿಸಲಿದೆ.